Ultimátum de Ames á Mancomunidade Serra do Barbanza polos problemas na recollida do lixo
O executivo de José Miñones advirte que se non resolven as deficiencias no servizo, contratarán un camión para facelo con medios propios // No rural non se recolle dende o 10 de marzo
![Ultimátum de Ames á Mancomunidade Serra do Barbanza polos problemas na recollida do lixo Ultimátum de Ames á Mancomunidade Serra do Barbanza polos problemas na recollida do lixo](http://www.elcorreogallego.es/binrepository/900x600/0c47/900d506/none/102922340/YWSP/berta_785897_manual_CG1046198_MG155840729.jpg)
![Ultimátum de Ames á Mancomunidade Serra do Barbanza polos problemas na recollida do lixo Ultimátum de Ames á Mancomunidade Serra do Barbanza polos problemas na recollida do lixo](http://www.elcorreogallego.es/binrepository/900x600/0c47/900d506/none/102922340/HKSP/berta_785898_manual_CG1046198_MG155840730.jpg)
O goberno municipal vén de enviarlle unha carta á presidenta da Mancomunidade Serra do Barbanza, Teresa Villaverde, na cal se lle traslada a deficiente situación do servizo de recollida de lixo no concello de Ames. O que máis lle preocupa o goberno local é a situación na que se atopa o rural, onde non se recolle o lixo dende o pasado 10 de marzo. Nos núcleos urbanos estase normalizando a situación, aínda que existen rúas nas que non se está prestando dito servizo. Se persiste esta situación, contratarase un camión para facer a recollida con fondos propios, para de seguido depositar o lixo na planta de tratamento de Lousame. Estes gastos remitiránselle á Mancomunidade.
O pasado luns, 13 de marzo, o goberno municipal recibiu aviso da Mancomunidade Serra do Barbanza dando traslado de que existían de novo problemas cos camións que realizan o servizo de recollida do lixo. Isto derivou novamente na prestación dun deficiente servizo ao longo desta semana tanto nos núcleos urbanos coma no rural. Despois de que o goberno municipal se puxese en contacto coa Mancomunidade, este mércores pasado prestouse dito servizo nas localidade de Bertamiráns e do Milladoiro, pero nalgunhas rúas quedaron colectores sen recoller. A isto hai que engadir que dende o pasado venres, 10 de mazo, non se recolle o lixo nas parroquias do rural.
O concelleiro de Urbanismo, Obras Públicas e Servizos Básicos, Blas García, explica que o que máis nos preocupa é a situación do rural onde levan xa 6 días sen o servizo de recollida de lixo. Estamos en contacto coa Mancomunidade para que o máis axiña posible se normalice este servizo no rural. De non ser así, optariamos por retirar o lixo con medios propios. Dende o Concello xa contactamos cunha empresa para contratar un camión para recoller o lixo e, posteriormente, depositalo na planta de tratamento de Lousame. Se optamos por está vía, os gastos da contratación de dito camión, remitiránselle á Mancomunidade.
Asemade, os técnicos municipais están elaborando un informe para sobre a falta deste servizo durante este mes de marzo, ao igual que sucedeu no pasado mes de febreiro, para enviarllo á Mancomunidade co obxectivo de que fagan o correspondente desconto na factura que lle paga o Concello a esta entidade pola prestación do devandito servizo.
O alcalde de Ames, José Miñones, indica que a falta de recollida durante varios días está provocando que se acumule lixo nas rúas dos dous grandes núcleos urbanos, así como en todo o rural, onde a situación agrávase sen recollida dende o pasado venres. Este feito está provocando un problema de salubridade que non imos a permitir que vaia a máis. Por iso solicitamos da Mancomunidade unha solución inmediata. De non cumprir coa prestación deste servizo nun prazo e 24 horas, procederemos á recollida do lixo pola nosa conta.
Debido a esta situación, dende a Concellaría de Servizos Básicos pídenlle colaboración á veciñanza amesá e que, na medida do posible, non depositen lixo nas beiras dos colectores de lixo, e piden desculpas polas molestias ocasionadas. Agárdase que nas próximas horas quede solucionada esta falta de servizo e volva a prestarse con normalidade.