Accidentado Día da Clase Obreira Galega
Ferrol acolle unha xornada marcada pola división sindical e os enfrontamentos // Forcexos entre membros do 15-M e sindicalistas de CCOO // Todos os sindicatos chaman á folga xeral, pero por separado
![Accidentado Día da Clase Obreira Galega Accidentado Día da Clase Obreira Galega](http://www.elcorreogallego.es/binrepository/1737x506/419c0/900d506/none/102922340/EUBR/mg9018_575894_CG735875_MG157553264.jpg)
![Accidentado Día da Clase Obreira Galega Accidentado Día da Clase Obreira Galega](http://www.elcorreogallego.es/binrepository/1760x506/430c0/900d506/none/102922340/DVRT/mg9018_575895_CG735875_MG157553265.jpg)
![Accidentado Día da Clase Obreira Galega Accidentado Día da Clase Obreira Galega](http://www.elcorreogallego.es/binrepository/900x548/0c21/900d506/none/102922340/GWRG/mg9018_575896_CG735875_MG157553266.jpg)
![Accidentado Día da Clase Obreira Galega Accidentado Día da Clase Obreira Galega](http://www.elcorreogallego.es/binrepository/1373x506/237c0/900d506/none/102922340/OQLR/ferrol01_575897_CG735875_MG157553267.jpg)
![Accidentado Día da Clase Obreira Galega Accidentado Día da Clase Obreira Galega](http://www.elcorreogallego.es/binrepository/1181x506/141c0/900d506/none/102922340/LMNM/ferrol02_575898_CG735875_MG157553268.jpg)
![Accidentado Día da Clase Obreira Galega Accidentado Día da Clase Obreira Galega](http://www.elcorreogallego.es/binrepository/1387x506/244c0/900d506/none/102922340/MKHI/ferrol01_575899_CG735875_MG157553269.jpg)
Baixo un sol de xustiza, o Día da Clase Obreira Galega transcurriu en Ferrol marcado polos incidentes e a división sindical. Á ofrenda floral organizada polo Concello non asistiron nen o BNG, nen a CIG, nen o PSdeG. Os dous primeiros por discrepancias ideolóxicas, os socialistas polo congreso galego. Pero o acto institucional contou cuns convidados sorpresas: membros do 15-M que se encargaron de despregar pancartas nas que acusaban a Toxo e Méndez de "traidores". Os momentos de tensión desembocaron en enfrontamentos entre o movemento 15-M e os sindicalistas de CCOO, que mesmo chegaron a forcexar entre eles (ver vídeos que acompañan esta información).
Como é habitual, dúas manifestacións percorreron a cidade por separado para conmemorar o Dez de Marzal. Únicas coincidencias: a lembranza de Amador Rey e Daniel Niebla, traballadores do naval mortos en 1972 baixo disparos da policía franquista; e as consignas contra a reforma laboral. A partir de aí, medran as discrepancias. CCOO marchou en solitario por un lado cunhas 2.000 persoas, a CIG por outro con 1.000 e a UGT directamente non se manifestou. Na cabeza de CCOO ía o seu secretario xeral, Ignacio Fernández Toxo, moi crítico coa presenza de membros do 15-M: "É lamentable, hai unha falta de memoria por parte dos manifestantes do 15-M, no 72 houbo dous asasinados e 40 feridos e eles non se merecían este espectáculo".
Toxo tamén se referiu á convocatoria da folga xeral para o 29 de marzo contra a reforma laboral: "O Goberno central fai a folga inevitable, nun contexto de recesión o que menos necesita España é o conflicto social, nas mans do Goberno está evitalo". Toxo lembroulle a Mariano Rajoy que "cando el era vicepresidente con Aznar, no 2002 houbo unha reforma laboral que despois se modificou e causou o cese de seis ministros". Na manifestación da CIG, o seu secretario xeral celebrou que CCOO e UXT finalmente tamén convoquen folga o 29 de marzo. Pero segundo Suso Seixo, será moi complicado que a CIG comparta pancarta coas centrais estatais. Seixo destaca que "eles se conforman con modificar a reforma, pero nós estamos radicalmente en contra e queremos tumbala".