O Consello Galego da Cultura sitúa a maior perda de galegofalantes nos últimos anos nos concellos pequenos
O informe do CCG subliña que a escola é "determinante" no manexo da lingua
![O Consello Galego da Cultura sitúa a maior perda de galegofalantes nos últimos anos nos concellos pequenos O Consello Galego da Cultura sitúa a maior perda de galegofalantes nos últimos anos nos concellos pequenos](http://www.elcorreogallego.es/binrepository/900x570/0c32/900d506/none/102922340/XQQL/cp12f03990251_429535_CG592820_MG135228529.jpg)
![O Consello Galego da Cultura sitúa a maior perda de galegofalantes nos últimos anos nos concellos pequenos O Consello Galego da Cultura sitúa a maior perda de galegofalantes nos últimos anos nos concellos pequenos](http://www.elcorreogallego.es/binrepository/900x559/0c27/900d506/none/102922340/GTUA/cp12f03990251_429536_CG592820_MG135228530.jpg)
![O Consello Galego da Cultura sitúa a maior perda de galegofalantes nos últimos anos nos concellos pequenos O Consello Galego da Cultura sitúa a maior perda de galegofalantes nos últimos anos nos concellos pequenos](http://www.elcorreogallego.es/binrepository/900x559/0c27/900d506/none/102922340/FSUA/cp12f03990251_429537_CG592820_MG135228531.jpg)
![O Consello Galego da Cultura sitúa a maior perda de galegofalantes nos últimos anos nos concellos pequenos O Consello Galego da Cultura sitúa a maior perda de galegofalantes nos últimos anos nos concellos pequenos](http://www.elcorreogallego.es/binrepository/900x570/0c32/900d506/none/102922340/EVQL/cp12f03990251_429538_CG592820_MG135228532.jpg)
Santiago. Non pode dicirse que a política lingüística desenvolvida pola Xunta entre 2003 e 2008 fose un éxito rotundo, pero logrou frear a vertixinosa caída de galegofalantes, prestixiou o uso do idioma propio e, sobre todo, serviu para aumentar os falantes bilingües. Os datos despréndese dun informe que publica o Consello da Cultura Galega (CCG) en vésperas dos Encontros de Normalización Lingüística, que hoxe comezan na Facultade de Xornalismo, en Santiago.
O informe supón un duro revés científico ás teses que defende a Xunta para aplicar o seu polémico decreto plurilingüístico, xa que, lonxe de proporcionar un conflito, a política lingüística do Bipartito alentou os galegofalantes e ampliou o bilingüismo.
O texto é unha panorámica básica da evolución sociolingüística de Galicia a través de varios parámetros, como a lingua habitual, a lingua inicial ou materna e as competencias lingüísticas. Tamén se ofrecen datos sobre o uso do galego en ámbitos determinados: o escolar, o familiar, social e laboral, así como os medios de comunicación e internet.
Para tracexar esa panorámica, cruzáronse os datos de tres fontes primordiais de información: o Mapa Sociolingüístico de 1992 -elaborado pola Real Academia Galega (RAG)-, e as enquisas de condicións de vida das familias do 2003 e do 2008, elaboradas polo Instituto Galego de Estatística.
Segundo o informe, as persoas que falan galego actualmente son o 58,8% da poboación. Entre 1992 e 2008, os bilingües con predominio do galego e os galegofalantes monolingües descenderon menos dun 10%. Unha evolución contraria á porcentaxe de monolingües en castelán, que se estabilizaron en niveis próximos ao 19% desde 2003. Porén, en 1992, eran castelanfalantes só o 10,6%. Significativo é que existe un maior grao de castelanización canto menor é a idade do individuo, aínda que se rexistra unha desaceleración na perda de falantes de galego.
O informe rompe tamén o dogma de que a substitución do galego polo castelán se acomete nas grandes cidades: ao parecer, nos últimos anos, a substitución concéntrase de forma case exclusiva nos concellos pequenos, mentres que nas cidades se detivo practicamente no último lustro.
Os datos indican tamén unha evolución decrecente do galego e do castelán como lingua materna única, gañando peso os que aprenden as dúas linguas na casa cando son nenos. O galego, con todo, segue a ser, segundo todas as fontes, a lingua materna da maioría da poboación. En 2008, máis de 600.000 galegos aprenderon as dúas linguas na casa, o dobre que en 1992.
Ao mesmo tempo, a lingua inicial por idades amosa tamén unha contención na perda de falantes iniciais de galego e mesmo nunha recuperación nalgúns treitos de idade. O dato máis positivo sería o crecemento absoluto de falantes iniciais de galego no último treito de idade respecto de 1992. O resto de tendencias apuntan cara a unha certa contención, augurando unha certa estabilidade ou punto crítico, segundo a interpretación.