Callón quere reabrir o debate social sobre o uso da lingua galega
Advirte unha etapa de retroceso // É o único idioma do estado que perde falantes, apunta
O profesor e expresidente da Mesa pola Normalización Lingüística, Carlos Callón, insta a abrir o debate social ao redor do galego ante a encrucillada que vive o idioma na actualidade, momento no que a maioría de informes advirten reiteradamente de que é a única lingua do Estado que perde falantes.
E o obxectivo da súa nova obra Galegocalantes e galegofalantes, publicada a través de Edicións Xerais e que continúa unha serie de libros-ensaio sobre a causa do idioma iniciada en 2010 con En castelán non hai problema.
O director de Xerais, Manuel Bragado, definiu esta publicación como unha crónica na que o autor tenta reconstruír un momento concreto e decisivo para a lingua, a partir do ano 2009, no que se rexistra un acusado retroceso dos usos sociais do idioma o plurilingüismo. Unha situación que, en paralelo, leva a unha activación social da defensa do idioma sen precedentes na comunidade galega e que esta obra pretende analizar e situarse como ferramenta polivalente, explicando un proceso e ofrecendo coraxe e argumentos para chamar tanto a cidadáns como institucións á corresponsabilidade.
O propio Callón destacou, a súa intención de avivar o debate social sobre o idioma que segue vivo, e iso é unha razón para a esperanza, rematou.