A USC edita o novo libro de Trillas, pai da lóxica borrosa en España
A obra 'El desafío de la creatividad' presentouse onte como unha viaxe intelectual arredor da capacidade de creación
![A USC edita o novo libro de Trillas, pai da lóxica borrosa en España A USC edita o novo libro de Trillas, pai da lóxica borrosa en España](http://www.elcorreogallego.es/binrepository/900x600/0c47/900d506/none/102922340/TLNU/cp36f08936601_849747_manual_CG1126074_MG155110480.jpg)
![A USC edita o novo libro de Trillas, pai da lóxica borrosa en España A USC edita o novo libro de Trillas, pai da lóxica borrosa en España](http://www.elcorreogallego.es/binrepository/900x600/0c47/900d506/none/102922340/SENU/cp36f08936601_849748_manual_CG1126074_MG155110481.jpg)
"Crear require, ademais de inducir, o entusiasmo persoal por crear algo novo, relevante e rompedor, así como asombrarse previamente polas novas preguntas e as posibles respostas ás mesmas". Esta é unha das ideas coas que Enric Trillas conclúe o seu libro El desafío de la creatividad, obra que o autor presentou no día de onte na Reitoría da Universidade de Santiago e que lle serviu para afirmar que "o futuro demandaranos creatividade".
O libro preséntase como "unha viaxe intelectual arredor do mundo da creatividade dende unha visión da mesma pegada ao razoamento non dedutivo ordinario, concretamente á obtención das conxecturas chamadas 'especulacións'". Como o mesmo autor adianta no proemio da obra, esta "defende unha visión naturalística do fenómeno da creatividade, soportada na linguaxe, dentro do razoamento ordinario e como parte importante da racionalidade".
Como se puxo de manifesto no acto de onte, "este ensaio quere servir de guía e estímulo" para propor unha "reflexión sobre o desafío que, maiormente de tipo computacional, a creatividade formula á ciencia".
En opinión do autor, o concepto de creatividade propón un "desafío que require a transformación dos actuais estudos sobre o razoamento ordinario ou de sentido común nunha ciencia empírica, á vez teórica e experimental: unha física da linguaxe e o razoamento, como a física é a ciencia da materia, a enerxía e o movemento".
A nova obra presentouse nun encontro cos medios de comunicación que presidiu a vicerreitora de Comunicación, Cultura e Servizos da Universidade de Santiago, Mar Lorenzo Moledo, e no que tamén interviñeron ademais do autor o prologuista do volume, o ex reitor da USC Senén Barro, e o director do Servizo de Publicación, Juan Luis Blanco Valdés.
Más información en El Correo Gallego (edición papel) y en Orbyt